HDPê bang li CHPê kir: ‘Em serî li Dadgeha Makezagonê bidin’
Cîgirê Koma HDPê Çaglar Demirel li meclisê civîna çapemeniyê li dar xist û bangê li parlementerên CHPê kir ku li dijî rakirina parêzbendiyan de bila îmze bidin ku serî li Dadgeha Makezagonê were kirin.
Ji bo serlêdana komane li Dadgeha Makezagonê were kirin, divê herî kêm 110 parlementer îmze bidin. Hejmara parlementerên HDPê 58 e. Divê 52 parlementerên din jî imze bidin ku serlêdana komane pêk were.
‘Ji bo îmzeyan em bang li wicdanan dikin’
Demirel ragihand ku wan li dijî qanûna derbarê rakirina parêzbendiyan kampanyaya îmzeyê daye destpêkirin û eger ji bo serlêdanê hejmara îmzeyan temam bibe, dê derbarê wê qanûnê de ji bo îtirazê dê serî li Dadgeha Makezagonê were kirin û wiha got:
‘Ji bo serlêdana Dadgeha Makezagonê em dizanin ku hejmara parlementerên me têrê nake. Ji bo îmze bête temamkirin, em bangê li wicdanan dikin. Em li hemû parlementerên ku li pêşberê dîrokê naxwazin serê xwe bitewînin re bangê dikin ku bila piştgiriyê bidin vê yekê.’
Demirel destnîşan kir ku di nava vê hefteyê de ji bo îtirazê bi awayekî ferdî dê serî li Dadgeha Makezagonê bidin.
Îdrîs Balukên bertek nîşanî Kiliçdaroglu da
Cîgirê Koma HDPê û Parlementerê Amedê Îdrîs Baluken bertek nîşanî Serokê Giştî yê CHPê Kemal Kiliçdaroglu da û wiha got:
‘Em dizanin ku gelek parlementer, ji feraseta CHPyê ya li hemberî teklîfa derbeyê, aciz e. Nêzî 100 parlementeran vê yekê li kampa Antalyayê anine ziman û nîqaşên dijwar jî pêk hatine. Ew hevalên ku ji vê yekê aciz in, ji me re ragihandin ku derbarê serlêdana îtiraza ji bo betalkirina madeya rakirina parêzbendiyan de; wê piştgiriyê bidin me. Lêbelê derbarê vê mijarê de Kiliçdaroglu parlementeran tehdît kiriye û ev yek jî teqlîda Erdogan bi xwe ye.’
Baluken got: ‘Kiliçdaroglu ji wekîlan re gotiye ku wekîlên ku îmze bidin, yan dê îstifa bikin yan jî dê derbasî HDPê bibin. Dema dengdana veşartî de çawa ku komîserên Erdogan zextê li ser wekîlên AKPê pêk anîn, Kiliçdaroglu ji hewl dide ku heman tiştî bike. Ev yek betalkirina îradeya parlemeteran e. Em hêvî dikin ku parlemeterên CHPê piştgiriyê bidin ku li hemberî teklîfa derbeyê, serlêdana komane li Dadgeha Makezagonê were kirin. Helwesta rastî ev e. Hêviya gelê me yê azadîxwaz jî ji CHPê ev e.’
(NV/YO)