Ayfer Duzdaşê strana duyem a albûma xwe ya "Kilomên Arxawûnê" weşandiye

Fotograf: YouTube

Ayfer Duzdaşê straneke din ji albûma xwe ya bi navê “Kilomên Arxawûnê” weşandiye. Navê stranê “Li min” û stran li ser hemû platformên dîjîtal hatîye weşandin.

Kilama “Li min” ji devera Yazîxan/ Meletîyê hatîye berhevkirin. Ayfer Dûzdaşê kilam di sala 2022yan de ji Sirri Kiroglanî ve berhev kirîye.

Caner Yilmazî aranjoriya kilamê kiriye û Aram Dildarî derhêneriya klîbê kiriye.

20 sal in Ayfer Dûzdaş li qadê xebatên berhevkirina stranan dike. Ayfer Dûzdaş li ser xeta Semsûr, Çorûm, Mereş, Meletî, Dêrsim û Koçgiriyê ku Elewîyên Kurd û Xoresanî dijîn, stranên berhev dike.

Ayfer Dûzdaşê di hevpeyvînekê de ji Ferîd Demîrelî re gotibû ku ji bo vê albûmê li 15 gundên Arxawûnê bi 18 kesên çavkanî re axivîye. Wê hevdîtinên xwe yên bi van çavkaniyan re kirine, him wekî deng him jî wekî vîdeoyan tomar kirine.

Ayfer Dûzdaşê nêzî 100 heb berhem berhev kirine û ji wan berheman 13 kilam di albûma wê de cîh girtîye.

“Kilamên Arxawûnê yên bi kurdî nehatine bihîstin”

Ayfer Dûzdaşê di hevpeyvîne de gotiye ku dema ew behsa ya Kilamên Arxûwanê yen bi kurdî dike, her kes şaş dibe û dibêjin: ““Tedî Meletî bajarekî kurdan tê zanîn lê bi bandora sîstemê asîmilasyoneke cidî li Meletiyê pêk hatiye. Kurdên li wir jî koçî metropolan dikin. Dema em behsa stranên kurdî yên Arxûwanê dikin, behsa albumê dikin, mirov gelekî dibehitin. Dibêjin ‘Ma li wir kurd hene?’

"Li Meletiyê hejmareke zêde kurd hene. Kurd gelek in li vî bajarî. Bi taybet ji ber polîtîkayên zext û zordariyê û yên asîmîlasyonê, civaka vir xwestiye xwe biparêze. Çanda xwe, baweriya xwe parastiye û bi dizî ev xebat meşandine. Vê jî hiştiye ku di nava demê de gelek tişt ji vê çandê winda bibin. Tiştekî din jî heye ku mirov pê xemgîn dibe. Êdî ev civak naxwaze bi zimanê xwe biaxive, stranên xwe bistirên û ji çanda xwe şerm dike.” (HS/FD)