Li paytext Kîevê dîsa bombe teqiyane

Fotograf: AA

Ji bo nûçeya tirkî bitikîne

Rûsyayê îro di saetên sibehê de careke din êrîş biriye ser paytexta Ûkraynayê, Kîevê.

Rûsyayê di 24ê Sibatê de Ûkrayna dagir kiribû.

Li gorî nûçeya ku Ajansa Anadolûyê ragihandiye, di saetên sibehê de, ji ber êrîşên li ser Kîevê, bi kêmanî du teqîn pêk hatine.

Şaredarê Kîevê Vitaly Kliçkoyî li ser hesabê xwe yê medyaya civakî ragihandiye ku li herêma Şevçenskî ya paytextê, du teqînên cuda pêk hatine. Şaredarî bang li welatiyan kiriye ku di stargehan de bimînin.

Serokê Rêveberiya Leşkerî yê Herêma Kîevê, Oleksiy Kulebayî jî ji niştecihên Kîevê re gotiye ku bila haya wan ji alarmên asmanî hebin.

Nûçegîhana rojnameya The Guardinê ya ingilîzî, Charlotte Higginsê ragihandiye ku li bajêr vê sibê bi kêmanî dengê sê teqînan hatiye wê.

Piştî Higginsê, sernûçegîhanên The Guardianê Daniel Boffeyî jî li ser hesabê xwe yê medyaya civakî, nivîsandiye ku li dijî bajêr îro heşt êrîş pêk hatine. Boffeyî paşê jî nivîsandiye û gotiye ku êrîşa bi balafirên bêmirov a nehan jî pêk hat.

Hîna nehatiye aşkerekirin ku bê ka êrîş bi çi pêk hatine û di encamê de mirî û birîndar hene yan na. Şaredarê Kîevê Kliçkoyî li ser hesabê xwe yê Twitterê fotografek weşandiye û gotiye: "Enqaza balafira bêmirov a kamîkaze ya vê sibê li Kievê daye." (SD/FD)