“Mihrîcana kayûm ne mihrîcana çanda Amedê ye"

Şaredariya Bajarê Mezin a Amedê ya kayûm tayînkirî biryar daye ku Festîvala Duyem a Rêya Çandê ya Sûrê li dar bixe. Ji ber pevçûna di navbera Filistîn û Îsraîlê de, konserên di bernameya Festîvalê de hatin betalkirin. Lê biryar e ku bernameyên din ên Festîvalê pêk bên. 

Festîvala navborî di nava beşeke civakê de bû sedema nerazîbûnan. Endama Lijneya Rêveber a Odeya Mîmaran Qiymet Yildiz û Rêvebirê Komeleya Çand û Hunerê ya Dîcleyê Celal Ekînî nêrînên xwe yên derbarê vê festîvalê û bernameyên mîna wan de ji bianet kurdî re anîn ziman. 

Rêvebirê Navenda Çand û Hunera Dicleyê Celal Ekînî anî ziman ku mihricanên bi destê kayûman tê çêkirin ne li gorî çanda kurdevariyê ne: “Bi van çalakiyan bajarê Amedê nayên nasandin. Mîhrîcanên ku tên çêkirin çand û zimanê vî gelî temsîl nakin. Gazî hin hunermendên Kurdistanî dikin lê ez texmîn dikim ku tevlî van çalakiyan nebin.” 

Endama Lijneya Rêveber a Odeya Mîmaran a Amedê Qiymet Yildizê diyar kir ku plansaziya Sûrê ne ji bo jiyanê lê ji bo bazirganiyê hatiye çêkirin. (SY-VB/FD)