Aysel Tûglûk ji girtîgehê birine nexweşxaneyê

Ji bo nûçeya tirkî / ingilîzî bitikîne

Siyasetmedar Aysel Tûglûk a ku li girtîgehê bi nexweşiya demansê ketiye, di saetên sibehê de birine nexweşxaneyê.

Li gorî nûçeya MAyê, Tûglûk li beşa lezgîn tê dermankirin.

Hevseroka Giştî ya berê ya Partiya Demokratîk a Gelan (HDP) Fîgen Yuksekdagê di dema danişîna Doza Kobaniyê de axiviye û gotiye ku Tûglûk şandine nexweşnaxeyê.

Yuksekdagê diyar kiriye ku Tûglûk demek beriya niha bi nexweşiya Covid-19ê ketiye û bi ser hemdê xwe de nehatiye: “Me îro ew şand bela lezgîn. Şert û mercên neyênî yên girtîgehê tenduristiya wê xirabtir dike.”

Bixwîne - HDPyê ji bo Aysel Tûglûkê serî li Saziya Pişkîneriya Dewletê daye

Bixwîne - Dozgerî xwestiye ku Aysel Tûglûka girtî, "bê girtin"

Bixwîne - Aysel Tûglûk: Ez nizanim ji ber çi têm dadgehkirin

Çi bûbû?

Aysel Tûglûk di 29ê Kanûna Pêşiyê ya 2016an de dema Alîkara Hevserokê Giştî yê HDPyê bû tevlî 7 siyasetmedarên Partiya Herêmên Demokratîk (DBP) û Kongreya Civaka Demokratîk (KCD) hatibû girtin.

Îdianame ji bo wê hatibû amadekirin ku tê de daxuyaniyên wê yên dabû çapemeniyê û beşdarbûna wê ya li cenazeyan ên di dema ku Hevseroka KCDyê bû, weke delîl hatibûn nîşandan.

17em Dadgeha Cezayê Giran a Enqereyê di 16ê Adara 2018an de 8 sal cezayê girtîgehê li Tûglûkê birîbû. Dadgehê li gorî Qanûna Dijterorê ya hejmar 3713ê cezayê wê bi qasî dua qatan zêde kiribû û ew bi 12 salan ceza kiribû. Her weha li gorî heman biryarê ji 6an 1ê cezayê wê kêm kiribû û di encamê de 10 sal cezayê girtîgehê li Tûglûkê birîbû.

Parêzerên Tûglûkê serî li Dadgeha Edliyeya Herêmî ya Enqereyê dabûn lê dadgehê daxwaza wan qebûl nekiribû. Parêzeran dosye şandibû Dadgeha Bilind.

Derbarê Aysel Tûglûkê de?

Endama Lijneya Rêveber a Weqfa Lêkolînên Civakî û Hiqûqî û ya Komeleya Mafên Mirovan bû. Yek ji avakarên Komeleya Jinên Welatperwer e.

Endama Avakar a Partiya Civaka Demokratîk (DTP) e û bûye Hevseroka Giştî ya heman partiyê. Di serdama 23yem de (22.07.2007-31.12.2009) weke parlamentera Amedê hatiye hilbijartin. Di navbera salên 2011 û 2015ê jî ji Partiya Demokratîk a Gelan (HDP) weke parlamentera Wanê hatiye hilbijartin. Di heman partiyê de Alîkara Hevserokên Giştî bû ku ji Mafên Mirovan û Hiqûqê berpirsiyar bû.