Başak Demirtaş: Tenê hezkiriyên Selahattîn dikarin bêjin Selo

Ji bo nûçeya tirkî bitikîne

Hevserokê KCDê Berdan Ozturk, Hevberdevkê Partiya Çep a Kesk Îbrahîm Akin, Hevseroka DBPê Salîha Aydenîz, Serokê Giştî yê EHPê Hakan Ozturk, namzetên parlamenteriyê yên Amedê û gelek welatî beşdarî vekirina buroya hilbijartinê ya Partiya Çep a Kesk a Kayapinarê bûn.

Heyeta ku beşdarî vekirina buroyê bû ji aliyê gel ve bi coşekî mezin hat pêşwazîkirin.

Her weha Başak Demîrtaş, hevjîna Selahattîn Demîrtaş, Hevserokê Giştî yê berê yê Partiya Demokratîk a Gelan(HDP) jî beşdarî vekirinê bû û li vir axaftinek kir.

“HDPyî bûne tirs û xofa wî”

Başak Demirtaşê ji bo hedefgirtina Demîrtaş bertek nîşanî Serokomar Recep Tayyîp Erdoganî da û wiha got:

"Niha di van rojan de dîsa dest bi gotina Selahattîn kiriye. Ji ber ku hilbijartin nêzîk dibe. Di her hilbijartinê de Selahattîn û hevalên wî tên bîra wî. Ji ber ku Selahattîn û hevalên wî, Kurd in, ji ber ku HDPyî ne. HDPyî bûne kabûsa wî, ev kabûsa wî berdewam dike. Tenê hezkiriyên Selahattîn dikarin bêjin Selo, tenê gelê me dikare bêje Selo”

“Em ê di 14ê Gulanê de bersiva wî bidin”

Başak Demîrtaşê diyar kir ku heqaretên Erdogan ên li Selahattîn Demîrtaş tenê li Selahattîn Demîrtaş nayê kirin û got, "Ev heqaret li me hemûyan e. Ji ber ku me dengê xwe da Selahattîn, Fîgen Yuksekdag û HDPê, me xwest ku nûnertiya me bikin. Ez bawerim Di 14ê Gulanê de hûn ê li ser sindoqan bersiva herî xurt bidin wî."

“Em ê vê desthilatê bişînin”

Piştre Hevserokê Partiya Çep a Kesk Îbrahîm Akîn axivî û wiha got: “Tirkiye di nav hilbijartineke pir dîrokî de ye. Em bi zalimekî re rû bi rû ne, em bi dîktatoriyê re rû bi rû ne. Êdî dawiya ev zilma dîktator a bi salan hatiye. Gelê me bi nivîsandina destana berxwedanê hatiye heta roja îro, destana vî gelî îro ji her derê tê dîtin. Divê em li hember vê destanê serî netewînin. Lê ev rejîma qeyûm, rejîma Sarayê hê jî dixwaze zilma xwe bidomîne. Desthilatdariya AKP-MHPê ya ku bi hêza xwe nekarî bi dest bixe, niha jî bi girtina alîgiran dixwaze bi dest bixe. Bi nûnerên hêzên tarî re hevdîtin kirin. Ew ê jî nikaribin li ber xwe bidin. Gelê me li dijî planên hilweşînê yên 7 sal in li qadan e. Em ji bo guhertina rejîmê li vir in, em tên, em ê di 14ê Gulanê de wan bişînin. Têkoşîna bi rûmet a gelên berxwedêr bi ti hêzê nikare têk biçe. Îro em vê yekê careke din dibînin. Vaye meydana Amedê! Tişta ku em li Amedê û li her derê pir zelal dibînin ev e. Em êdî nikarin rojekê jî tehemûlê diktatoriya wan bikin. Em ê vê îqtîdarê bişînin.

“Pirsgirêka Kurd bêyî gelê Kurd çareser nabe”

“Em îdîa dikin; Çareseriya pirsgirêka Kurd û hatina aştiyê di destê me de ye. Em berendamê tesbîtkirina gotinên kesên wek we ku destana berxwedanê ne. Em ji bo çareseriya vê pirsgirêkê li parlamentoyê namzet in. Em dizanin ku wê çareser bibe, ji ber ku niha hûn navnîşana çareseriyê ya qonaxa berxwedanê ne. Daxwaza gelê Kurd a azadî, ziman û nasnameyê wê li meclîsê bê qebûlkirin. Wekî din rê tune, rêyek din tune. Her kesî ew dît. Dibêjin divê em biaxivin û pirsgirêka kurd çareser bikin. Ez dîsa dibêjim; Sedema vê ji bilî berxwedana we ne tiştek e. Ji ber vê yekê em ê berxwedana xwe bidomînin û di 14ê Gulanê de em ê li vî welatî sedsalek nû bidin destpêkirin. Em ji vê bawer dikin. Werin 14ê Gulanê, em xwedî li sindoqan derkevin. Pisîk dikeve hundir, mişk dikeve hundir, yekî din dikeve hundir, li cem vana lîstik pir in.. Ji ber vê yekê em heta kêliya dawî dest ji têkoşînê bernedin. Werin em hemû ji van sindoqan encam bigirin û bi hev re di 15ê Gulanê de govenda xwe bigerînin. Baş e ku hûn hene, baş e ku hûn li vir in. An serkeftin, an serkeftinek.”

Piştî vekirina buroyê govend hat gerandin û meşale hatin pêxistin. Bê navber dirûşmeyên “Jin, jiyan, azadî”, “Girtiyên siyasî rûmeta me ne” û “Bila girtîgeh vala bibin, ji girtiyan re azadî” hatin berzkirin.(RY/AY)