Belgefilma “GAĞAND”* wê li Stenbolê bê nîşandan

Ji bo nûçeya tirkî bitikîne

Cejna Gağandê li Dêrsim û derdora wê tê pîrozkirin. Lê ev cejn weke gelek kevneşopiyên din li ber windabûnê ye. Derhêner Ûmûr Hozatli û produktor Cemal Taşî belgefilmek li ser vê cejnê amade kirine û xwestine balê bikişînin ser ve cejna kevnare.

Belgefilm bi navê “Gağand/ Merdena Khalek’i” cara pêşiyê 13ê Çiriya Pêşiyê (Cotmehê) li Dêrsimê li Navenda Çandê ya bajêr hatiye nîşandan.

Galaya belgefilmê wê 13ê Kanûna Pêşiyê ango 13ê Gağandeyê li Stenbolê li Navnenda Çanda Fransizê were pêşkêşkirin.

Di danesîna belgefilmê de hatiye gotin ku “Gağand – Merdena Khalek’i yek ji wan çandên qedîm ên li ber jibîrkirinê ne. Cejna Gağandê gelên Dêrsimî di serî de li ji hêla hin gelên Mezopotamyayê ve tê pîrozkirin. Ji bo balê bikişînin ser candên din ên winda bûne û li ber windabûnê ne û pêşî li ber windabûna wan bigirin, me hewl da ku em hemû hêlên Cejna Gağandê di belgefilmê de nîşan bidin.”

Belgefilm wê 15 Kanûna Pêşiyê li bajarê Winterthura Swîsreyê û paşê jî li hin bajarên din ên Ewropayê bê nîşandan. 

Derbarê Cejna Gağandê de

Li Dêrsimê weke sersal tê qebûlkirin. Li gorî Salnameya Hicriyê tê pîrozkirin. Di çanda kurdên elewî de rojeke girîng e. Di vê rojê de mêrek an jî zarokek kur bi hiriyê riheke spî ji xwe re çêdike û xwe dixe şiklê kalekî ku navê wî Kalo ye, dîsa mêrek an jî zarokekî kur xwe dixe şiklê pîrekê ku navê wê Fato ye. Koma bi serpereştiya Kalo û Fatoyê derdikeve rê, li gund mal bi mal digerin û xwarinê kom dikin, govendê digerînin. (FD)

* Beşek ji kesên kirmanckî-axêv alfabeya Jacobsonî bi kar tînin. Di vê alfabeyê, ji alfabeya Bedirxanî cidatir tîpa Ğ (ğ) jî heye. Ji ber vê rewşê kesên ku belgefilm amade kirine, navê belgefilmê ne weke Gaxand lê Gağand nivîsandine.