Derhênera rêzefîlma Netflixê: Ez hêvî dikim ji bo nifşên nû yên kurdan bibim îlham

Ji bo nûçeya tirkî / ingilîzî bitikîne

Îsal rêzefîlmeka bi navê Skylines dê li Netflixê bê weşandin. Derhênera rêzefîlmê Soleen Yusef e. Me pirsên xwe ji Soleenê kirin.

Rêzefîl dê 27ê Îlonê bê weşandin.

Soleenê ji bianetê re got:

“Bêguman ez gelek serbilind im. Herweha bi rastî ji bo ez bigihim xewn û xeyalên xwe gelekê bixîret xebitîm.

“Ez hêvî dikim ku ji bo nifşên ciwan ê kurdan bibim îlham. Ez dixwazim welê bikim ku ew bikevin pey xeyalên xwe yên mezin û ji bo nêrîna xwe bixebitin.

“Ez ji hemî projeyên ku lê dixebitin hîn dibim. Ez hewil didim stîl û nêrîna xwe bi pêş ve bibim. Hêj li ser wê rêyê me. Skylines bi rastî jî projeyek e ku min gelek jê hez kiriye.”

Skylines

Rêzefîlmeka Netflixê ye. Zimanê wê Almanî ye. Mijara wê sûcdarî, rêxistinên sûcdarîyê û mûzîkjenên hip-hopbêj in.

Ji Dihokê ber bi Almanyayê ve

Soleen Yusef sala 1987ê li Dihokê hatiye dinê. Dema ew neh salî bûye malbata wê ji ber sedemên sîyasî mecbûr bûye ku bar bike Almanyayê. Wê derhênerîya çar fîlman kiriye. Herweha senaryonivîsa du fîlman e.

Derhênerên jin ên kurd: Em pê serbilind in

Derhênera naskirî Bîna Qeredaxîyê li ser hesabê xwe yê medyaya civakî diyar kiriye ku:

“Ez hew dikarim pê serbilind bibim.”

Derhênera belgefîlman, Hatîce Kamerê jî ji bianetê re got:

“Ciwan pirtir ji înternetê li rêzefîlm û fîlman temaşe dikin. Netflix platformeka mezin e. Ji bilî ku ew (Soleen) kurd e gelek giring e ku jineka ciwan li van platforman be. Pê serbilind im. Keyfxweş im.”

Netflix

Sala 1997ê hatiye avakirin. Navenda wê li Dewletên Yekbûyî yên Amerîkayê ye. Avakerên wê Reed Hastings û Marc Randolph in. Li ser înternetê fîlm û belgefîlm û hwd diweşîne.

(MB)