DMMEyê Tirkiye mehkûm kir ku ji ber nîşana serfiraziyê cezayê girtinê dabû Işikirikî

Ji bo nûçeya Tirkî / Ingilîzî bitikîne

Bi hinceta ku li Amedê beşdarî merasîma cenazeyekî û çalakiyeke li zanîngeha xwe bûbû Mûrat Işikirik 4 sal û 8 meh ceza xwaribû û di girtîgehê de mabû. Işikirik dema girtî mabû ji zanîngehê jî hatibû avêtin. Li ser vê rewşê Işikirikî serî li Dadgeha Mafên Mirovan a Ewropayê (DMME) dabû û ev serlêdana wî encam da.

Dadgehê duh biryara xwe aşkere kir û biryar girt ku azadiya kombûn û birêxistinbûn a Işikirikî hatiye binpêkirin û 16 hezar Euro cezayê pare da Tirkiyeyê.

Bi beşdariya merasîma cenazeyê û çalakiya li zanîngehê hat sûcdarkirin

24ê Adara 2006ê 14 PKKyî hatibûn kuştin. Cenazeyê çar kesan ji bo li Amedê bên binaxkirin radestê malbatên wan kirin. 28ê Adarê cenaze ji mizgeftê hatin wergirtin û nêzîkî 2 hezar kes ji bo beşdariya merasîmê kom bûn. Li gorî rapora polîsan, piştî binaxkirinan komeke ji hezar kesan pêk tê bi sloganan dest bi meşê kirin. Polîsan mudaxele li komê kirin, hin kesan kevir avêtin polîsan. Di dema pevçûnê de ziyan gihiş wesayitan, bankayan û dikanan. Çalakî di 29, 30 û 31ê Adarê û 1ê Gulana 2006ê de berdewam kirin.

Di 5ê adara 2007yê de ji bo Serokê PKKyê Abdûllah Ocalanî li kampusa Zanîngeha Dîcleyê çalakî çêbûn.

Mûrak Işikirik ê ku niha 33 salî ye wê gavê li Beşa Felsefeyê ya Zanîngeha Dîcleyê dixwend.

Işikirik di 9ê Adara 2007yê de hat desteserkirin. Di jêpirsîna xwe ya li Şûbeya Têkoşîna li Dijî Terorê ya Midûriyeta Emniyeta Amedê de bi beşdariya wan çalakiyan hat sûcdarkirin ku 28ê Adara 2006ê di dema merasîma cenazeyan de û piştî wê û piştî salekê li zanîngehê çêbûne. Işikirikî sûcdarî qebûl nekirin. 10ê Adarê di îfadeya xwe ya dozgeriyê de fotografên ku di dema her du çalakiyan de hatine kişandin nîşanî wî dan.

Mûrat Işikirikî di îfadeya xwe de got PKKiyekî ku hatiye kuştin xizmê hevalekî wî ye û ji bo erka xwe ya olî pêk bîne beşdarî merasîmê bûye lê kevir neavêtiye polîsan. Got ku ew wisa texmîn dike dema bi hevalên xwe re li ber avahiya zanîngehê rûdinişt fotografên wî hatine kişandin û wî tevlî çalakvanan slogan berz nekirine. Di heman rojê de ew derxistin pêşberî Dadgeha Cezayê Giran a Amedê û bi sûcê “propagandeya rêxistinê” hat girtin.

Nîşana serfiraziyê weke delîl nîşan dan

Îdianame di 8ê Gulana 2007yê de hat amadekirin. Işikirik li gorî xala 7/2yê ya Yasaya Têkoşîna li dijî Terorê bi “propagandeya rêxistinê” û li gorî xala 314/2yê ya Yaseya Ceza ya Tirkan bi “endamtiya rêxistinê” hat sûcdarkirin. Weke delîl jî ew fotografê Işikirik nîşan dan ku nîşana serfiraziyê kiriye.

Daneşîna pêşiyê di 19yê Hezîrana 2007ê de çêbû. Işikirikî got ku dibe tevlî girseyê nîşaneya serfiraziyê kiribe lê di cenaze û çalakiyê de slogan berz nekiriye. Şahidê ku beşdarî daneşînê bû jî heman tişt anî ziman.

Di daneşîna çaremîn a 30ê Çiriya Paşiyê ya 2007yê de Işikirik ji ber “endamtiya rêxistinê” û “propagandeya rêxistin” hat sûcdarkirin û dadgeh 7 sal û 11 meh cezayê girtinê daye wî.

Dadgeha Bilind biryar qebûl nekir lê dadgeha herêmî careke din Işikirikî sûcdar dît.

Dema daxwaza tehliyeyê kir ji dibistanê hatibû avêtin

Mûrat Işikirik piştî 4 sal û 8 mehan di girtîgehê de ma, 15ê Çiriya Paşiyê ya 2011yê tehliye bû. Lê ji ber dema girtî bû nekarîbû beşdarî dersan û ezmûnan bibe ji Zanîngeha Dîcleyê hatibû avêtin. Îtiraza li hemberî vê jî nehat qebûlkirin.

Işikirikî li ser vê rewşê serî li DMMEyê da.

Li gorî biryara DMMEyê ya ku duh daye, di çarçoveya xala 11emîn a Peymana Mafên Mirovan a Ewropayê mafê azadiya birêxistinbûnê û kombûnê ya Işikirikî hatiye binpêkirin.

Tirkiye, bi 7 hezar û 500 Eûro tazmînata manewî û bi 8 hezar û 500 Euro tazmînada madî hat cezakirin. (AS/FD)