Encama Bijartina Komîteya Kurdî ya Eurodramê diyar bûye

Komîteya Kurdî ya Eurodramê encamên bijartina şanonameyên ji bo wan hatine şandin aşkere kiriye. Komîteyê li ser malpera xwe ya fermî ragihandiye ku piştî wan bangewaziya beşdarbûnê kiriye, 8 kesan serî li wan daye. Lijneya hilbijartinê di encama nirxandinên xwe de biryar daye sê şanonameyan hilbijêre.

Bixwîne - Mîrza Metîn: Bi vê derfetê dibe ku şanonûsên kurd berê xwe bidin cîhanê

Komîteya Kurdî ya Eurodramê ev encam di 27ê Adarê Roja Şanoyan a Cîhanî de aşkere kiriye.

Li gorî vê encamê şanonameyên ku hatine hilbijartin ev in:

1- Na Bavo Hê Li Rawestgehê Me - Mistoyê Heco

2- Pepûk Çi ye Tu Dizanî? - Kemal Orgun

3- Forsa Şerko - Yusuf Unay

Mîrza Metînî Koordînatorê Komîteya Kurdî ya Eurodramê ji bianetê re gotibû, "Komîteya Kurdî ya Eurodramê dê van şanonameyên hatine hilbijartin pêşnîyarî komîteyên zimanên din û şanoyên bîyanî bike da ku rê li ber wergerandin û sehnekirina wan vebe. Weşanxaneya Avesta bijareya 2019-2020an a Komîteya Kurdî ya Eurodramê wê weke pirtûkekê çap bike."

Komîteyê di daxuyaniya xwe de wiha gotiye: "Heke ew roj bê û ev rojên bêyom û bêqidoş derbas bibin û mirovayî xwe ji vê vayrûsa wêrtas xelas bike, komcivîna Eurodrama navneteweyî, ya ku her sal li welatekî û li bajarekî cuda tê lidarxistin, îsal dê di meha Cotmehê de li Madrîda Spanyayê bi rê ve biçe û di vê komcivînê de bo komîteyên zimanên din em ê danasîna van şanonameyên hilbijartî û her wiha danasîna nivîskarên van şanonameyan bikin da ku rêyeke gerdûnî vebe bo şanonûsan."

Komîteya Kurdî ya Eurodramê piştî demekê hatibû nûkirin û endamên nû dest bi xebatê kiribûn. Komîteyê banga beşdariyê li şanonûsan kiribû û diyar kiribû ku heta 15ê Kanûna Paşîn wê bikaribin serî lê bidin. Paşê ev dem heta 15ê Sibatê hatibû dirêjkirin.

Endamên Komîteya Kurdî ya Eurodramê ji van navan pêk hatiye:

- Berfîn Zenderlioğlu (Derhêner, Lîstikvan, Dramaturg, Stenbol)
- Çetoyê Zêdo (Dramaturg, Şanonûs, Lêkolîner, Mêrdîn)
- Erdal Ceviz (Derhêner, Stenbol)
- Helîm Yûsiv (Nivîskar, Wupertal)
- Hîlmî Demirer (Lîstikvan, Wergêr, Stenbol)
- Kawa Nemir (Helbestvan, Wergêr, Amsterdam)
- Mîrza Metîn (Şanonûs, Derhêner, Koln - Koordînatorê Komîteyê)
- Nurten Demirbaş (Dramaturg, Stenbol)
- Nurullah Kaya (Derhêner, Lîstikvan, Nivîskar, Stenbol - Sekreterê Komîteyê)
- Shaliko Bêkes (Derhêner, Dramaturg, Lîstikvan, Moskova)
- Sînan Akcan (Dramaturg, Senarîst, Stenbol)

(FD)