Hevserokê HDPê Selahattin Demirtaş peyam şand: Em dest bi greva birçîbûnê dikin

Ji bo nûçeya Tirkî / İngilîzî bitikîne

Hevserokê Partiya Demokratîk a Gelan (HDP) Selahattin Demirtaş îro ji Girtîgeha Tîpa F a Edirneyê mesajek şand û aşkere kir ku ew û Parlamenterê HDPê yê Colemêrgê Abdullah Zeydan dê dest bi greva birçîbûnê bikin.

Peyama Demirtaş a ji HDPê û raya giştî re şandiye wiha ye:

“Ji ber helwesta Midûrê Girtîgeha Edirneyê ya li hemberî diyalogê, pêkaînên ji derveyî hiqûqê, helwesta dijmirovî ya li hemberî girtiyên din û ji ber ku di mijara greva birçîbûnê de ku bi rojane berdewam dike ti gavên niyetpak neavêtiye, em ji roja înê û pê de dest bi greva birçîbûnê dikin.

“Em daxwazê ji raya giştî dikin ku di mijara grevên birçîbûnê yên di girtîgehan de û di mijara binpêkirinan de bi hestiyar bin.

Sebahat Tuncel jî ji bo piştgiriyê dest bi grevê dike

Hevseroka Partiya Herêmên Demokratîk (DBP) Sebahat Tuncel jî diyar kir ku ew ê di Girtîgeha Silivriyê de di navbera 1 û 5ê Nîsanê de greva birçîbûnê bigire.

Tuncelê bi rêya DBPê ev mesaj şand:

“Ji bo ku tecrîda giran a li ser Ocalan bê rakirin, diyalog û guftûgo destpê bikin, binpêkirinên mafan yên girtîgehan bi dawî bibin û çewisandinên li ser gundan bidawî bibin grevên birçîbûnê yên bêdem û bêdor yên li girtîgehan ketiye asteke metirsîdar.

“Ez jî ji bo ku ev daxwaz bên qebûlkirin di navbera 1 û 5ê Nîsanê di li Girtîgeha Hejmar 9 a Silivriyê tevlî komeke hevalan dest bi greva birçîbûnê dikim.”

Daxwazên kesên di greva birçîbûnê de ne

Greva birçîbûnê ya ku di 15ê Sibatê de li Girtîgeha Şakranê ya ji hêka girtiyên ji doza PKKê û PJAKê bi beşdariya gelek girtîgehên li Tirkiyê bi awayê bêdem an jî bidem berdewam dike.

Kesên di grevên birçîbûnê de ne daxwazên xwe wiha tînin ziman:

“Bila şert û mercên tecrîda giran ên li ser Serokê PKKê Abdullah Ocalan bên rakirin.”

“Bila qedexe û wêrankirina li bajarên Kurdan bidawî bibin.”

Bila helwestên xirab ên di girtîgehan de li hemberî girtiyan bidawî bibin.”

Li kîjan girtîgehê çend roj in greva birçîbûnê berdewam dike?

Li gorî rapora Komeleya Mafên Mirovan (İHD) di Girtîgeha Şakranê de 5 jê jin 33 girtî di 44emîn roja grevê de ne. Li Girtîgeha Edirneyê 16 girtî di roja 34, li Girtîgeha Tîpa T a Wanê 8 girtî di roja 23, li Girtîgeha Jinan a Sincanê 7 girtiyên jin di roja 36emîn de ne ku greva birçîbûnê destpê kiriye.

Herwiha ji her girtîgehê 5 girtî ji bo 5 rojan di navbera 15ê Adarê û 15ê Nîsanê dest bi greva bidor kirine.

Di nameya ku ji Girtîgeha tîpa E a Mêrdînê ji bo bianetê hatiye şandin de, bangewaziya piştgiriya berxwedanê tê kirin û girtiyan nivîsandiye ku wan dest bi greva birçîbûnê ya bidem û bidor kirine.

(AS/FD)