Li Sûriyeyê di hefteyên dawiyê de sûîqestên siyasî pêk hatine

Ji bo nûçeya Tirkî bitikîne

Li bajarên Reqqa, Girê Spî, Minbic û Tebqayê yên li Bakurê Sûriyeyê di çend hefteyên dawiyê de çend kuştinên failên wan nediyar çêbûne. Li gorî zanyariyên duh li ser malpera Rêxistina Çavdêriya il Mafên Mirovan a Sûriyeyê, cesedê kesekî bi cil û bergên leşkerî li ser rêya El Mansûrayê hatiye dîtin ku li rojavayê Reqqayê dikeve. Li gorî heman zanyariyan tê texmînkirin ev ker sîxurê istixbaratê yê Hêzên Sûriyeya Demokratîk (HSD) e.

Omer Allûş jî hatibû kuştin

15ê Adarê di encama sûîqestekê de yek ji rêveberên Konseya Sivîl a Reqqayê Omer Allûş hatibû kuştin. Li gorî nûçeya Associated Pressê (AP) Allûş li mala xwe ya li Girê Sipî hatiye kuştin. Allûş yek ji wan kesan bû ku li Sûriyeyê di sazkirina polîtîkayên piştî DAIŞê yên DYAyê roleke girîng dilîst. Ajansê di heman nûçeyê de cî daye nêrînên Foza Yûsif Hevseroka Lijneya Rêveberiyê ya Federasyona Demokratîk a Bakurê Sûriyeyê.

Yûsifê sûîqest bi gotinên “derbeyek li ser tevgera Ereban û Kurdan û aştiya civakî ya piştî têkbirina DAIŞê” nirxandiye û diyar kiriye ku Allûş di avakirina konseya bajarê Reqqayê û pêşxistina têgihiştina jiyana wekhev ya li Girê Spî, Reqqa û Tebqayê rolekî gelekî girîng dilîst. Foza Yûsifê Tirkiye berpirsiyarê sûîqestê dibîne.

Sûîqest li hemberî Berdevkê Konseya Leşkerî yê Minbicê pêk hatiye

Piştî kuştina Allûşî, 17ê Adarê Şervan Derwîş Berdevkê Konseya Leşkerî yê Minbicê rastî sûîqestekê hat. Du gule li Derwîşî ket û bi birîndarî ew rakirin nexweşxaneyê.

Li ser ihtimala êrîşa Tirkiyeyê ya li ser Minbicê, meha kanûna paşiyê Derwîş axivî bû û wiha gotibû, “Em amade ne ku bersiva her cure êrîşan bidin. Helbet di mijara parastina li ser Minbicê de koordînasyona me û hevpeymana navnetewî berdewam dike.”

Li Tebqayê parêzerek hatiye kuştin

Li gorî Rêxistina Çavdêriyê ya li Mafên Mirovan li Sûriyeyê 17yê Sibatê li Tebqayê parêzer ji hêla hin kesên nediyar ve li mala xwe hat kuştin. Li gorî heman zanyariyê tê texmînkirin ku ev kes ji serwîsa istixbaratê ya HSDyê ye û beriya niha di vekişîna DAIŞê ya ji Tebqayê de navbeynkarî kiriye. (ŞA/FD)

* Fotograf: Omer Allûş (yê berbiçavk û porsî) bi xizmê şervanekî HSDyê re ku şervan li Reqqayê hatiye kuştin. (Çavkanî: AP)