PKK: Tu pêwendiyek me bi teqîna li Stenbolê re nîne

Ji bo nûçeya tirkî bitikîne

Fermandariya Biryargeha Navenda Parastina Gel (NPG) ku serbi PKKyê ye têkildarî teqîna li Kolana Îstîklalê ya Taksîma Stenbolê daxuyaniyeke nivîskî weşandiye.

Di daxuyaniya ku li Ajansa Nûçeyan a Firatê hatiye weşandin de wiha hatiye gotin:

“Gelê me û raya giştî ya demokratîk dizane ku tu têkiliya me bi vê bûyerê re tune, em sivîlan nakin hedef û çalakiyên li dijî sivîlan jî qebûl nakin. Em tevgereke wisa ne ku, em têkoşîneke bi heq û meşrû ya azadiyê dimeşînin. Bi perspektîfa ku em dixwazin bi civaka Tirkiyeyê re siberojeke hevpar, demokratîk, azad û wekhev ava bikin, em tevdigerin. Ji ber vê qet nabe ku em li ser zemîna Tirkiyeyê kesên sivîl bikin hedef.

Eşkere ye ku li dijî têkoşîna me ya rewa rejîma AKP û MHP’ê ditengije. Bi taybetî ji ber ku teşhîr bû ew çekên kîmyewî bi kar tînin û dîmenê şewitandina leşkerên wan derket holê. Ji bo ku vê rewşê biguherînin tê dîtin ku dixwazin planeke tarî têxin meriyetê. Piştî vê bûyerê Kobanê kirine hedef û ev jî plana wan diyar dike”

“Dema ku mirov ji vê çarçoveyê lê binihêre, tê dîtin ku ev bûyereke tarî ye, hêmanên ku di vê bûyerê de tên bikaranîn tê îddîakirin ku Kurd an jî kesên ji Sûriyeyê ne lê ev tişt wê encamê neguherîne. Tê dîtin ku ev destpêka planeke tarî ye. Di vî warî de girîng e ku hêzên demokrasiyê yên Tirkiyeyê û raya giştî vê pêvajoya tarî bibînin, ji bo ku ev bûyer were deşîfrekirin têbikoşin.”(TY/AY)