Ji ber barana zêde û lehiyê 9 kes mirin
Ji ber barana zêde û lehiyê, li Tirkiyeyê 9 kes mirin.
Barana zêde ya roja Şemî û Yekşemê li seranserê Tirkiyeyê bû, li Êlih û Amedê bû sedema mirina 8 kesan.
Li gorî daxuyaniya Wezîrê Kar û Barên Navxwe Alî Yerlîkayayî ya li Eregliyê 3 welatî ji ber lehiyê mirin. Her weha cenazeyê xebatkarekî keştiya ku noqî avê bûbû, hate dîtin.
Êlih
Ji ber barana zêde, li Êlihê lehî rabû û jina bi navê Lalîhan Guner a 54 salî û sê zarokên xwe bi ber avê ketin. Piştî demekê cenazeyê Gunerê ya niştecîha Taxa Seyîdan e, hate dîtin.
Li gorî nûçeya Ajansa Mezopotamyayê, temenê zarokan di navbera 1 û 9an de ye.
Vê sibê xebatên lêgerîna 3 zarokan dest pê kiriye û di encamê de cenazeye 3 xwişk û birayan hatine dîtin.
Baranê bandoreke zêde li gelek taxên Hurriyet, Gultepe, Fatîh, Belde, Şafak, Karşiyaka, Kultur, Çamlitepe û Seyîdan kir û gelek mal di bin avê de man.
Baranê bandoreke mezin li Nexweşxaneya Perwerde û Lêkolînê ya Êlihê jî kir. Piştî barîna baranê, av kete nava nexweşxaneyê.
Waliyî Êlihê Ekrem Canalpî daxuyaniyek weşand û diyar kir ku 3 welatî birîndar in û ew birine nexweşxaneyê.
Di 2006an de 11 kes miribûn
Di sala 2006an de li heman cihî dîsa ji ber barana zêde lehî rabibû û 11 kes miribûn.
Li Amedê welatiyek mir
Li Amedê jî ji ber baranê av rabû û li navçeya Hênê welatiyê bi navê Behçet Avci kete çem û ber bi avê ve çû. Avciyê 45 salî li nava erdekî hate dîtin. Avciyê birîndarbûyî birine nexweşxaneyê lê digel hemû midaxeleyan ew miriye.
Li Farqîn û Bismilê jî lehî rabû û av kete nava gelek malan.
Li gorî nûçeya Rojnameya Xwebûnê li gundê Fêra yê navçeya Farqîna Amedê ji ber barana pir zêde lehî rabû. Ava ku ji Çemê Xiyaz Bega û Çemê Delê hatin li nava gundê Fêra gihîştin hev bû lehî. Lehiyê xesarek mezin da ka û erdên gundiyan. Lehiya li gund rabû lodên kayê û gelek alav û amûrên li nava gund dan ber xwe. Gelek alavên gundayan bi lehiyê re çûn.
LI FARQÎNÊ LEHÎ RABÛ
— Kadrî Esen (@kadriesen1) November 19, 2023
Li gundê me Fêra #Farqîn baraneke zêde bsriya û lehî rabû. Baran û lehiyê ev encam bi xwe re anî.#Baran#Lehî#Amed pic.twitter.com/nWwwxBR9C9
Li Zongûldakê jî welatiyek mir
Li navçeya Eregliyê ya Zongûldakê keştiyek noqî avê bûye. Xebatên lêgerînê yên xebatkarên keştiyê berdewam dikin. Di encama xebatan cenazeye xebatkarekî hatiye dîtin.
Bandor li çendîn bajaran kir
Barana zêde li navçeya Artûklû û ya Qoserê ya Mêrdînê bû sedem ku av bikeve nava malan û dikanan.
Li navçeya Artûklûyê ji ber barana zêde lêhî rabû û av kete nava malan. Ji ber baranê, kevir û heriya li ser rê kom bûbû, rê asê kirin. Her wiha li Rêya Kamor û kolanên navberê yên Kolana Yenîyolê jî ji ber ava kombûyî, welatî û wesayit bi zehmetî derbas bûn.
Li navçeya Artûklûyê, li gelek cihan bagera dijwar, dar qelibandin. Darek li ser Rêya Yenîyolê qelibî ser trafoyekê û trafo jî ji ber bagerê qelibî. Herwiha gelek tabelayên kargeh û navnîşanan jî ji cih derketin.
Digel barana zêde bariya û lehî rabû, Şaredariya Artûklûyê û Şaredariya Bajarê Mezin a Mêrdînê ya bi destê kayûm ve tê birêvebirin, xebat neda meşandin.
Li navçeya Qoserê av kete nava mal û kargehan. Kolan bûn gola avê û tabelayên kargeh û navnîşanan jî ji cih derketin.
Çend dîmen ji Marsê. ☀️#mars #mêrdîn pic.twitter.com/FhcovolzB1
— Beekeeper Wahdet 🐝 (@Wahdetucar) November 19, 2023
Duh ji saetên serê sibehê heta ber êvarê li beriya Nisêbîn, Qoser yên Mêrdînê û bajarê Hesekê toz û bager heye. Midûriyeta Giştî ya Meteorolojiyê ji bo bajar hişyariya bi “Koda zer” da û piştî bagerê asîmanê Mêrdînê zer bû. Ji ber toz û ecaza zêde çav çavan nabîne û ezman ser bûye. Li gelek taxan jî ceyran hatin birîn.
(FD)
