Ayhan Bîlgen: Ez ê dest ji wezîfeyê berdim

Ayhan Bîlgen, Hevserokê Şaredariya Qersê ku di çarçoveya operasyona li dijî HDPê de hatibû desteserkirin aşkere kiriye ku ew ê îstifa bire û gotiye, “Min temenê ku bi demokrasiyê were leyîstin derbas kiriye”

Stenbol

Ayhan Bîlgen: Ez ê dest ji wezîfeyê berdim

Ji bo nûçeya tirkî bitikîne

Ayhan Bîlgen, Hevserokê Şaredariya Qersê ku di çarçoveya "lêpirsîna Kobanê" de di 25ê Îlonê de hatibû desteserkirin li ser hesabê xwe yê medya civakî aşkere kiriye ku ew ê dest ji wezîfeyê berde.

Bîlgenî weha gotiye:

"Min temenê ku bi demokrasiyê were leyîstin derbas kiriye. Şert û mercên Tirkiyeyê jî ne xwedî wê yekê ne ku leyîstik were lîstin. Ez destûrê nadim ku bi desteserkirinên kêfî bi îradeya bajarekî were leyîstin. Hûn dixwazin bigirin, hûn dixwazin berdin, heta dema desteserkirina min biqede û heke qeyûm nehatibe tayînkirin ez dê dest ji wezîfeya serokatiya şaredariyê berdim. Qers di wê astê de ye ku dê xwe birêve bibe. Spasiya hemû hembajariyê xwe dikim ku yên dengên xwe dane û nedane me. Heke li Qersê bi serok şaredarek jin xebat were birêvebirin tenê ne siyasî wê kêşeyek civakî jî were çareserkirin. Divê tu tiştek ne wek berê be."

Çi bûbû?

Serdozgeriya Komarî ya Enqereyê di 25ê Îlonê de li 7 bajaran ji bo 24 endamên Lijneya Birêvebirinê a Navendî(LBN) ya Partiya Demokratîk a Gelan (HDP) biryara desteserkirinê dabû. Siyasetmedarên HDPyî ji ber lêpirsîna derbarê çalakiyên Kobanê de hatibûn desteserkirin ku ev çalakî di 6-12ê Çiriya Pêşiya 2014an de pêk hatibûn.

Piştî biryara dozgeriyê Hevşaredarê Qersê Ayhan Bîlgen, endamê Lijneya Bilind a Radyo û Televizyon3e (RTUK) yê HDPyê Alî Urkut, Endamê Komisyona Karûbarên Derve yê HDPyê Nazmî Gur, Endamên berê yên LNByê yên HDPyê Can Memîş, Gulfer Akkaya, Berfîn Kose, Bîrcan Yorûlmaz, Endamê LNByê yê HDPyê Alp Altinors, parlamenterên berê yên HDPyê Sirri Sureyya Onder, Ayla Akat Ata, Emine Ayna, Beyza Ustun û Altan Tan, endama Meclîsa jinan a HDK-HDPyê Dilek Yagli, endamê berê yê Pardiya Meclîsa HDPyê Pervîn Oduncu, û berdevkê berê yê HDPyê Gunay Kubilay hatibûn desteserkirin.

Kesên ku hatibûn desteserkirin heman rojê li bajarên ku lê dijîn anîbûn Rêvebiriya Emnîyetê ya Enqereyê. HDPyîyên ku 24 saetan qedexeya hevdîtinê li ser bûn ji duh pê ve bi parêzerên xwe re dest bi hevdîtinan kirine.(EMK/AY/FD)