DAIŞê êrîşî Mexmûrê kiriye: 9 Pêşmerge û 3 welatiyan can dane

Fotograf: AA (Arşîv)

DAIŞê duh li Mexmûrê êrîşî du gundan kiriye. Di encamê de 9 Pêşmerge û 3 welatiyan can dane. 

Endamên DAIŞê duh bi şev êrişî gundên Xidirce û Laweriyan ên li herêma Qereçûx a ser bi navçeya Mexmûrê ve kirine. 

Li gorî nûçeya Rûdawê di dema rûbirûbûna wan çekdaran de komeke Pêşmerge ketine kemîna endamên DAIŞê û di encamê de her 7 Pêşmerge can dane.

Rojnewsê di nûçeya xwe de diyar kiriye ku DAIŞê êrîşî gundan kiriye û li Xidirceyê 3 welatî kuştine. 

Li gorî nûçeya Kurdistan24ê welatiyên hatine kuştin, kurên muxtarê gund bûne. 

#ISIL attacked two villages in Makhmur- #Erbil Governorate. 4 people have reportedly been killed (3 of which are brothers). injuries have been reported as well.#TwitterKurs pic.twitter.com/2UJdDtf4dy

— Goran Shakhawan (@GoranShakhawan) December 2, 2021

Fermandariya Hêza Pêşmergeyan daxuyanî daye 

Di vê navberê de Fermandarê Hewlêrê ya Hêza Pêşmergeyan Necat Xule diyar kiriye ku raîdêk û neqîbek tevlî 5 Pêşmergeyan bi armanca rêgirtina li DAIŞiyan bigirin çûne û li wir ketine kemîna DAIŞiyan û hemû jî can dane. 

Li gor gotina wî fermandarê Pêşmerge, bûyerê li ser çiyayê Qereçûx û li gundê Nazî Kend rû daye.

Fermandarê Eniya Mexmûr-Gwerê yê Pêşmergeyan, Sîrwan Barzaniyî jî gotiye ku piştî bûyerê operasyoneke leşkerî dane destpêkirin. 

Her weha di êrîşeke din a DAIŞê de jî 2 Pêşmergeyan can dane.

Di rojên dawiyê de êrîşên DAIŞê zêde bûne

DAIŞê 27 Çiriya Paşiyê li herêma Kulceoyê ya navçeya Kifriyê ya Silêmaniyê êrîşî Pêşmergeyan kiribû. Di encamê de 5 Pêşmergeyan can dabûn. 4 jî birîndar bûbûn. Paşê jî Pêşmergeyekî birîndar miribû. 

Roja 29ê Çiriya Paşiyê jhi li heman navçeyê dîsa êrîş kiribû û di encamê de Pêşmergeyekî can dabû, 3 Pêşmerge birîndar bûbûn. 

DAIŞê di Hezîrana 2014an de kontrola tevahiya Mûsil, Salahaddîn û Enbarê û beşeke ji Diyala û Kerkûkê xistibû bin destê xwe. Ev herêm demeke dirêj di destê wan de mabûn û piştî operasyonên leşkerî ji destê wan hatibûn rizgarkirin.

Digel ku DAIŞê ji van deran hatiye derxistin jî, endamên wê li Kerkûk, Diyala, Mûsil, Salahaddîn û Enbarê êrîşan pêk tîne. 

Çavkanî: Rojnews, Rûdaw, Kurdistan24