Hejmara yekê ya Sînemaya Serbixwe, e-fanzîna li ser sînemayê derketiye

Hejmara yekê ya e-fanzîna bi navê Sînemaya Serbixwe hatiye weşandin. Di fanzînê de wê bi taybet li sînemayê û bi giştî jî li ser çand û hunerê nivîs, nûçe û zanyarî bên belavkirin.

Stenbol

Hejmara yekê ya Sînemaya Serbixwe, e-fanzîna li ser sînemayê derketiye

e-fanzîna bi navê Sînemaya Serbixwe, bi hejmara xwe ya yekê dest bi weşanê kiriye. Di hejmara yekê de nivîsên li ser sînemaya kurdî û ya cîhanê, pirtûkên derbarê sînemayê û hin zanyariyên din hatine weşandin.

e-fanzîna ku ji 18 rûpelan pêk hatiye di hejmara xwe ya yekê de behsa pirtûka Mizgîn Mujde Arslanê dike ku navê wê “Bêwelatî, Sînor û Mirin” e. Pirtûk bi tirkî hatiye weşandin û tê de nirxandinên li ser sînemaya kurdî hene. Edîtor û berpirsê e-fanzînê Rûmet Med Kayayî ev nivîs amade kiriye.

Dîsa Mela Mihyedîn bi navê “Efsaneya Selkiyan û filmê Ondîne” nivîsek nivîsandiye û behsa selkiyan dike ku di mîtolojiya îskoç, îrlandî û skandinavyan de lehengekî behrî ye.

Her weha yek du nivisên din jî derbarê sînemayê de hatine weşandin.

Amadekarên e-fanzînê bi vê nivîsa “Ji Edîtorê” behsa armanc û hedefên xwe kirine:

Ji Edîtor

"Silav û rêz xwînerên hêja!

Ji “Brayên Lumierê” û “Alice Guy-Blaché”, bi wir de Sînema ango “Hunera Heftemîn” ji gelek qonaxan derbas bû, geşedan û pêşveçûna xwe didomîne.

Sînema ji bo kesên ku derd û gotinên wan hene amûr û derfeteke gelek mezin e. Di nav dîroka sînemayê de gelek derhêner û sînemavanên bîrawer derketin, hest û ramanên xwe anîn zimanê. Di geşedan û girseyîbûna sînemayê de; gelek rêbazên ên hunerî, rastibîniya civakî, heyamî û serbixwe
û ên din pêk hatin.

Hunera “Sînema”, di nav rojên jandar û tarî de bû hêviyeke germ û ronak û bihara vê bêdemsal şîn bû û vedibe... “Hunera Heft-emîn”; ruh û hêza ên dîmenan, newayan, peyvan û wêneyan e û me wekî pirtûkan, di nav asoyên hestan û ramanan de digerîne. Em bi saya sînemayê cihê ku me qet neçûne ji wan dibinîn, çand û jiyanên hemû mirovahiyê dinasînin. Rû û çavên sinemayê, sînorên ku li ser cîhanê radike û ew dikare bi demê re hemû xeletiyan û pêşdaraziyan tune bike.

Yekem hejmar a Fanzîna bi Kurdî “Sînemaya Serbixwe”, bi nivîs û gotarên xwe yên li ser Sînema, Çand-Hunerê, weke dengekê nû û ciwan li pêşberî xwendevanên xwe.

Bimînin bi xêr û xweşiyê de
Bi hevre ji Hejmarên nû ve"

(FD)