Komîsyona Hevbeş ji bo Semra Guzelê biryara xwe daye
Ji bo nûçeya tirkî / îngilîzî bitikîne
Komîsyona Hevbeş ya Edalet û Destûra Bingehîn a Parlamentoyê bi piraniya dengan biryara rakirina parêzbendiya Semra Guzel, Parlamentera Partiya Demokratîk a Gelan(HDP) daye. Endamên komîsyonê yên HDPyî li dijî biryarê derketine.
Komîsyon bi serokatiya Yûsûf Beyazit kombûye û piştî ku rojnamegeran dîmen girtine li salonê hatine derxistin. HDPê bertek nîşanî derxistina rojnamegeran li salonê daye.
Mehmet Ruştu Tîryakî, endamê komisyona HDPê ji bo Guzelê parastinê dike. Tîryakî bertek nîşanî Yûsûf Beyazit, serokê komîsyonê yê nû daye ku li şûna Bekîr Bozdag hatiye wezîfedarkirin.
Piştî civînê rapora ku di çarçoveya rakirina parêzbendiya Guzelê de hatiye amadekirin bi dengên parlamenterên AKP, MHP, CHP û IYI Partiyê qebûl bûye.
Komîsyona Hevbeş biryara rakirina parêzbendiya Semra Guzelê daye. Parlamenterên HDPê dengê na daye û li dijî biryarê derketine.
Çi bûbû?
Volkan Bora, endamê PKKê di sala 2017an de ji aliyê Hêzên Çekdarî yên Tirkan ve di encama operasyonekî hewayî de hatibû kuştin. Di encama lêkolîna telefona Volkan Borayî de wêneyên Semra Guzelê û Bora yên bi hev re kişandibûn derketibûn. Ev wêne bi raya giştî re hatibû parvekirin.
Dema ew wêne li ser çapemenîya nêzî hikûmetê belav bûbû, Serokê Giştîyê AKPyê û Serokkomar Erdoganî daxûyanîyek dabû. Erdoganî gotibû “Me ev mijar yekser ji Komîsyona Têkel re şand. Çi hewce bike wê bê kirin. Em naxwazin kesên wiha di Meclîsa xwe de bibînin”.
Guzelê jî gotibû ku, Bora “dergistîyê” wê bû ye û ew wêne jî “di Dema Çaresarîyê de hatine kişandin”. Dema ew wêne hatine kişandin ti têkilîyê wê bi partîyên sîyasî re tunebû û ji bo ew wêneyên li ser Bora hatine dîtin, di derheqî wê de ti lêkolin nehatine vekirin. Guzelê berdewam kiribû û gotibû, ew wêneyên ku 5 sal berê hatine ditîn, îro wek “kemînek” ji bo wê tên bikaranîn.
Piştî ev wêne hatin weşandin derbarê Guzelê de ji bo ku parêzbendîya wê bê rakirin, fezleke hatibû amadekirin. Fezleke ji Komîsyona Têkel a Parlamentoyê re hatibû şandin.
Komîsyon di 20ê Kanûna Paşiyê de civîyabû. Lê berî ku Komîsyon bicive Meral Akşenera Seroka Giştîya Îyî Partîyê û Ozgur Ozelê Cihgirê Koma CHPê daxûyanî dabûn û gotibûn ew ê ji bo fezlekeyê denge “Erê” bikarbînin.
Li gor Ajansa Anadoluyê, par li meclisê bi giştî hezar û 336 fezlekeyên parêzbendiyê hebûn. Ev hejmar îsal jî bê navber zêdetir dibe lê ji bo hejmara guncaw heya aniha tu daxuyani ji aliyê Serokatiya Parlamentoyê ve nehatiye dayin. Fezleke herî zede derheqê parlamenterên HDPyê û CHPyê de ne. Derheqê parlamenterên AKP û MHPyê de hema bêje qet fezleke nîn in. (RT/AY)
