Li Parlamentoya Kurdistanê parlamenterên YNK û PDKyê li hev ketine
Fotograf: Parlamentoya Kurdistanê
Li Parlamentoya Herêma Kurdistanê di navbera parlamenterên Partiya Demokrat a Kurdistanê (PDK) û Yekîtiya Niştimanê Kurdistanê (YNK) de pevçûnê rû daye.
Parlamento ji bo ku hevdîtinê li ser Komîsyona Bilind a Referandûmê û ya Hilbijartinê ya Serbixwe ya Herêma Kurdistanê bike, civiyaye. Di dema civînê de ji ber vê mijarê, parlammenterên PDK û YNKyê bi hev ketine.
Li gorî nûçeya Rojnewsê Seroka Parlamentoyê Rêwaz Fayîq di destpêka civînê de axiviye û diyar kiriye ku ji bo parastina yekrêzî û niştimanî ya hêzên siyasî wê biryar daye hêza xwe ya teqez û bêmerc bi kar bîne û civînê taloq bike.
KDP & PUK members of parliament fist fighting over the reactivating the higher commission for elections, something the PUK opposes before amending the elections law. pic.twitter.com/n8ehimfg8y
— Kamal Chomani (@KamalChomani) May 22, 2023
Piştî ku civîn hate taloqkirin, Alîkarê Serokê Parlamentoyê Hêmin Hewramî daxwaz ji parlemeteran kiriye ku kî li gel domandina civîna parlamentê ye, xwe nîşan bide. Li ser vê yekê di navbera Parlamenterên YNK û PDKyê de alozî derketiye.
Piştî vê rewşê, parlameteran êrîşî hev kiriye û şer derketiye.
Li ser zêdebûna aloziyan û şer gelek parlamenter derketine li ser maseyan û dengê xwe li hev bilind kirine. Hin parlamenteran şûşeyên avê avêtine hev, hinan jî bi kulman li hev dane. Hêzên ewlekariyê ketine nava parlamentoyê û dawî li alozî û şer anîne.
Seroka Koma Tevgera Goran Gulistan Seîdê diyar kiriye ku karkirina komîsyonan ne tenê aliyek dikare ser biryar bigire, divê hemû alî yek bin.
Alîkarê Seroka Parlementoyê Hêmin Hewramî benda karkirina komîsyonê xiste dengdanê. Li gorî nûçeya Kurdistan24ê, di encama dengdanê de 58 parlamenteran deng ji bo karkirina komîsyonê dane.
Serokê Koma YNKyê Ziyad Cebar jî axiviye û gotiye: “Îro li ber bû kareke neyasayî bidin erêkirin. Me koma YNKyê pêşiya vê girt. Pêwîste karê komîsyon û erêkirina yasaya hilbijartinê bê nîqaşkirin." (FD)
*Çavkanî: Rojnews, Kurdistan24