Mêvanê vê beşa bernameya "Sihbetên Çayê", Rojnameger Ferid Demîrel e

Di beşa bernameya "Sihbetên Çayê" ya pêncan de wê nivîskar û rojnameger Ferid Demirel têkildarî pirtûkên xwe yên nû sihbetekê bike.

Stenbol

Mêvanê vê beşa bernameya "Sihbetên Çayê", Rojnameger Ferid Demîrel e

Mêvanê beşa 5an a "Sihbetên Çayê" wê edîtorê bianet kurdiyê Ferid Demirel be.

Bernameya "Sihbetên Çayê" di saet 18.00ê roja Şemiyê ya 25 Hezîranê de li Nînova Cafeyê ya li Taksîma Stenbolê wê pêk bê.

Demirel wê li ser mijara “Çîrokên Kurdan ên Ermenistana Sovyetê” biaxive ku demeke berê Weşanxaneya Cervantesê pirtûka wî ya bi navê "Çîrokên Şêwra Ermenan" û Weşanxaneya Sorê jî pirtûka wî ya bi navê "Guldesteyek ji Baxê Rewanê" çap kiribû.

Moderatoriya vê bernameyê wê Aziz Tekîn bike.

Di vê bernameyê de beşdarên bixwazin dikarin çaya xwe vexwin, bi şîrove û pirsên xwe beşdarî sihbetê bibin. Piştî sihbetê, nivîskar û rojnameger Demirel wê ji bo wan kesên dixwazin pirtûkên xwe îmze bike.

Chalak Event bernameya "Sihbetên Çayê" li dar dixe.

Navnîşan:

Taxa Şehît Mûhtar, Kolana Mîsê 5/3 Taksîm/Stenbol

Nînova Cafe

Derbarê Ferîd Demîrelî de

Ji sala 2000î û vir ve karê rojnamegeriyê dike. Ji Zaningeha Marmarayê, ji beşa Rojnamegerîyê derçûye. Dema xwendekarê zanîngehê bû hatiye girtin û 16 mehan di girtîgehê de maye.

Li Zaningeha Marmarayê di beşa Rojnamegerîyê de master kiriye lê mastera xwe neqedandiye. Di rojnamayên Birgün, Dicle Haber Ajansı (DİHA), Dem Tv, Rûdaw Tv û Sputnik Kurdistanê de wek nûçegîhan, edîtor, gerînendeyê nûçeyan û şef edîtor kar kiriye. Dema li Dem TVyê midûrê nûçeyan bû, hatiye girtin û 4 sal û 8 mehan di girtîgehê de maye. Edîtorî û redaktoriya gelek pirtûkan kiriye. Yek ji nivîskarên “E-Kitêba Rojnamegeriya Kurdî a Dijîtal”, “Ferhengoka Kurdî-Tirkî ya Nûçegihaniya Zayenda Civakî” ye. Nivîseke wî ya lêkolînê di pirtûka “Haber Analizi ve Arşiv İncelemeleriyle Türkiye’de 9 Gazete” de hatiye weşandin. Yek ji wergêrên pirtûkên “Pirtûka Destan a Nûçegihaniya Zarokparêz” û “Pirtûka Destan a Nûçegihaniya Pêvajoya Dadkirinê” ye. Li bianetê û Botan Internationalê, di Kargehên Medyaya Kurdî de dersên dîroka çapemeniya kurdî, rojnamegeriya mafparêz û hevpeyvînan daye. Nivîs û wergerên wî di kovarên Tîroj, Nûbihar, Yaba Edebiyat û Dilopê de hatine weşandin. Ji kurmanciya kîrîlî, translîterasyon û transkrîpsiyonê ber bi kurmanciya latînî dike. Pirtûka wî ya bi navê “Çîrokên Şêwra Ermenan” Weşanxaneya Cervantesê û ya “Guldesteyek ji Baxê Rewanê” jî Weşanxaneya Sorê çap kiriye.

(AY)