Rêxistina Efûyê: Li Îranê ya kêm 106 kes hatine kuştin

Ji bo nûçeya tirkî bitikîne

Rêxistina Efûyê ragihandiye ku li gor agahîyên wan ji medyayê kom kirine û bi vîdeoyan piştrast kirin ajimara xwenîşanderên li Îranê hatîn kuştin ji 106 kesan zêde ye.

Li Îranê, ji roja Înê ve hemwelatî zêdekirina bihayê petrolê protesto dikin.

Li gor nûçeyeka BBC Turkçeyê, dewleta Îranê li ser hesabê xwe yê Twitterê daye zanîn ku di xwenîşandanan de 12 kes mirine. Herweha hatiye ragihandin ku zêdetirî 200 kesan jî hatine desteserkirin.

Bixwîne - Îran: Di sê rojên xwenîşandanan de, 12 kes mirine

Rûdaw: Li Kirmanşanê 16 kes mirine

Li gor nûçeyeka malpera Rûdawê, ya ku duhî hatiye weşandin Tora Mafê Mirovan a Kurdistanê ragihandiye ku di nava 2 rojên borî de termê 16 kesan gihaye nexweşxaneya Îmam Reza ya bajarê Kirmaşanê.

Tora Mafê Mirov a Kurdistanê daye xuyakirin ku nêzîkî 100 birîndaran jî birine nexweşxaneya Îmam Reza.

Tora mefên mirov ya Kurdistanê saziyeke sivîl e ku nûçeyên binpêkariyên mafê mirov li navçeyên Başûrê Rojhilatê Kurdistanê li parêzgehên Kirmaşan û Sine û Îlam belav dike.  Sala 2014ê li Fransayê hatiye tomarkirin. 

Dozgerê giştî yê Kirmaşanê di beyannameyekê de eşkere kir ku kesên ziyan gihandibin xelkê û kerta giştî dê bêne girtin û bi tohmeta “belavkirina gendeliyê li ser erdê”  dê bêne dadgehkirin ku cezaya wan kesan jî lidardan û zindana heta hetayê ye.

Xwenîşandan dom dikin

Şeva borî li bajarên Bokan, Merîwan û Kirmaşan yê rojhilatê Kurdistanê hêzên ewlekariyê teqe li xwepêşanderan kirine , li bokanê 4 kes hatin kuştin ku yek keç û yek jî jin bû.  

Herweha li bajarên mezin yên Îranê weke Tehran, Isfehan,Şîraz, Ehwaz,Tewrêz , Bûşêhit û Meşhedê jî xwepêşandan berdewam in.

(EKN/MB)

*Çavkanî: Amnesty, Rûdaw, AA, bianet arşîv

Wêne: AA